Lev 7 | NdeIBE | STEP | “ ‘Le yimithetho ephathelene lomnikelo wecala, oyiwo ongcwele kakhulu.

Leviticus 7

Umnikelo wecala

1 “ ‘Le yimithetho ephathelene lomnikelo wecala, oyiwo ongcwele kakhulu. 2 Umnikelo wecala kufanele uhlatshelwe endaweni lapho umnikelo wokutshiswa ohlatshelwa khona, njalo igazi lawo kufanele lichelwe emaceleni wonke e-alithare. 3 Wonke amahwahwa awo azanikelwa: umsila ononileyo kanye ledanga elembesa ezangaphakathi, 4 izinso zombili lamahwahwa azo aseduzane lesinqe, lokwembese isibindi, okufanele kukhutshwe lezinso. 5 Umphristi uzakukutshisela e-alithareni njengomnikelo owenziwa kuJehova ngomlilo. Kungumnikelo wecala. 6 Wonke owesilisa emulini yomphristi angakudla, kodwa kufanele kudlelwe endaweni engcwele; ngoba kungcwele kakhulu.

7 “ ‘Umthetho munye uyasetshenziswa emnikelweni wesono kanye lemnikelweni wecala. Ungowomphristi owenza kube lendlela yokubuyisana labo. 8 Umphristi onikela umnikelo wokutshiswa kubani lobani angazigcinela isigogo. 9 Wonke umnikelo wamabele ophekelwa eziko loba ophekelwa embizeni loba embizeni yensimbi ungowomphristi owunikelayo, 10 njalo wonke umnikelo wamabele, oyabe uhlanganiswe lamafutha loba womile, wonke ungowamadodana ka-Aroni ngokulinganayo.

Umnikelo wobudlelwano

11 “ ‘Le yimithetho ephathelene lomnikelo wobudlelwano umuntu angawunikela kuJehova:

12 “ ‘Aluba unganikelwa njengendlela yokubonga, besekusithi ndawonye lomnikelo lowo owokubonga kufanele anikele amakhekhe esinkwa esenziwe singelamvubelo asihlanganise lamafutha, amakhekhana ayizicecedu enziwe engelamvubelo njalo enindwe ngamafutha, kanye lamakhekhe efulawa ecolekileyo axutshwe kuhle ahlanganiswa lamafutha. 13 Umnikelo wakhe wobudlelwano ungowokubonga kumele unikelwe ndawonye lomnikelo wamakhekhe esinkwa esenziwe ngemvubelo. 14 Kufanele alethe okukodwa komhlobo munye ngamunye njengomnikelo onikelwa kuJehova. Ungowomphristi ochela igazi lomnikelo wobudlelwano. 15 Inyama yomnikelo wakhe yobudlelwano ingeyokubonga kumele idliwe ngalonalelo langa lokuyinikela. Akumelanga eyinye isalele elakusasa.

16 “ ‘Kodwa aluba umnikelo wakhe ungenxa yokugcwalisa isifungo loba ungumnikelo nje wesihle, umhlatshelo lowo uzadliwa ngalonalelo langa lokuwunikela, kodwa okuyabe kusele kungadliwa ngelanga elilandelayo. 17 Yonke inyama yomhlatshelo esalayo kuze kwedlule izinsuku ezintathu kufanele itshiswe. 18 Nxa kulenyama yomnikelo wobudlelwano engadliwa ngelanga lesithathu, ayisoze ibalelwe kulowo oyinikeleyo, ngoba ingahlambulukanga. Umuntu odla enye yayo uzakuba lomlandu ngayo.

19 “ ‘Inyama ethinta loba yini engcolileyo ngokomkhuba akumelanga idliwe; kumele itshiswe. Kodwa eyinye inyama ingadliwa yiloba ngubani ohlambulukileyo ngokomkhuba.

20 Kodwa nxa kulomuntu ongcolileyo angadla inyama yomnikelo wobudlelwano engekaJehova, lowomuntu kumele axotshwe ebantwini bakibo. 21 Nxa kulomuntu othinta okuthile okungcolileyo – akukhathalekile kumbe kuyikungcola komuntu loba okwenyamazana loba okunye nje okungcolileyo, okwenyanyekayo – abesesidla inyama yomnikelo wobudlelwano engekaJehova, lowomuntu kumele axotshwe ebantwini bakibo.’ ”

Ukudla amaHwahwa leGazi kuyenqatshelwa

22 UJehova wathi kuMosi, 23 “Tshono lokhu kwabako-Israyeli: ‘Lingaze ladla amahwahwa ezinkomo, awezimvu loba awezimbuzi.’

24 Amahwahwa enyamazana ezifeleyo loba edatshulwe yizilo zeganga angasetshenziswa kokunye, kodwa akumelanga liwadle. 25 Umuntu odla amahwahwa enyamazana okungenziwa ngayo umnikelo wokutshiswa kuJehova kumele axotshwe ebantwini bakibo. 26 Njalo loba lihlala ngaphi lingadli igazi lenyoni loba inyamazana yiphi. 27 Aluba umuntu esidla igazi, lowomuntu kumele axotshwe ebantwini bakibo.’ ”

Isabelo sabaPhristi

28 UJehova wathi kuMosi, 29 “Tshono kuma-Israyeli uthi: ‘Umuntu oletha umnikelo wobudlelwano kuJehova kumele alethe ingxenye yawo njengomhlatshelo wakhe kuJehova. 30 Kumele alethe umnikelo kaJehova owomlilo ngezandla zakhe. Kumele alethe amahwahwa, ndawonye lesifuba, abesezunguza isifuba phambi kuka Jehova njengomnikelo wokuzunguza.

31 Umphristi uzatshisa amahwahwa ealithareni, kodwa isifuba ngesika-Aroni kanye lamadodana akhe. 32 Kumele uphe umphristi umlenze wesokudla eminikelweni yakho yobudlelwano ube ngumnikelo wakho.

33 Indodana ka-Aroni enikela igazi lamahwahwa omnikelo wobudlelwano izathola umlenze wesokudla njengesabelo sayo. 34 Ngithethe emnikelweni wobudlelwano wama-Israyeli, isifuba esizunguzwayo kanye lomlenze onikelwayo ngapha u-Aroni umphristi kanye lamadodana akhe njengesabelo sabo sezikhathi zonke esivela kwabako Israyeli.’ ”

35 Le yingxenye yeminikelo eyenzelwa uJehova ngomlilo eyabelwa u-Aroni kanye lamadodana akhe ngelanga abethulwa ngalo ukuba basebenzele uJehova njengabaphristi.

36 Ngelanga abagcotshwa ngalo, uJehova walaya abako-Israyeli ukuthi baphe lokho kubo njengasabelo sabo sezikhathi zonke kuzizukulwana ezizayo.

37 Le-ke yiyo imithetho emayelana lomnikelo wokutshiswa, umnikelo wamabele, umnikelo wesono, umnikelo wecala, umnikelo wokugcotshwa, lomnikelo wobudlelwano,

38 uJehova awupha uMosi entabeni yeSinayi ngelanga alaya abako-Israyeli ukuthi balethe iminikelo yabo kuJehova, enkangala yaseSinayi.